Skjaldborg 08
Heiðursgestur Skjaldborgar 2009
Þorfinnur Guðnason útskrifaðist 1987 frá California College of Arts and Crafts þar sem hann lagði stund á nám í kvikmyndagerð. Í framhaldi af því hóf hann störf hjá Sjónvarpinu þar sem hann starfaði um árabil sem myndatökumaður, klippari og dagskrágerðarmaður. Á fyrri hluta tíunda áratugarins sneri hann sér að gerð heimildamynda. Hann er einn fremsti kvikmyndagerðarmaður þjóðarinnar á því sviði enda á hann að baki einstaklega frumlegan og heillandi feril og hafa myndir hans hlotið fjölda viðurkenninga og mikla dreifingu um heim allan.
Húsey er ferðalag inn í íslenska smáveröld þar sem maðurinn lifir í sátt við náttúruna. Eyjan er við mynni Héraðsflóa og umlukin jökulfljótum – en þar renna Lagarfljót og Jökla saman í einn ós svo úr verður einstök lífskeðja á mörkum saltvatns og ferksvatns.
Húsey er matarkista og ein stærsta selveiðijörð landsins. Þar hafa safnarar og veiðimenn búið frá fornu fari og stundað selveiðar í hættulegum og beljandi jökulvötnum. Til þess hafa þeir notað veiðiaðferðir sem eru einstakar í heiminum og kenndar við eyjuna.
Húsey er topografísk mynd og fjallar um eitt ár í lífi síðasta selveiðibóndans á Íslandi. Um leið er skyggnst inn í líf dýranna sem búa í eynni og þeim fylgt í gegnum árstíðirnar.
Húsey var gerð árið 1991-1992 og er hefðbundin frásögn þar sem þulur og sögumaður leiða söguna áfram.
Myndin hlaut Menningarverðlaun DV 1994.
HAGAMÚS - MEÐ LÍFIÐ Í LÚKUNUM (1997)
Í myndinni kynnumst við tveimur músum, Óskari og Helgu, sem hittast einn góðan veðurdag í músagildru í búrinu á sunnlenskum sveitabæ. Þótt myndin sé ástarsaga í hefðbundnum skilningi – saga um strák sem hittir stelpu - veitir hún okkur líka innsýn í lífsbaráttu tveggja hagamúsa og veröld þar sem meinlaus þrösturinn er ægilegt skrímsli.
Hagamús - með lífið í lúkunum var sýnd í yfir 100 löndum. Myndin er framleidd af National Geographic Televison, Íslensku kvikmyndasamsteypunni, Náttúrufræðistofnum og Námsgagnastofnun.
LALLI JOHNS (2001)
Í myndinni fylgjumst við með hinum geðþekka Lalla flækjast á milli kráa, Litla Hrauns og félagsþjónustustofnanna. Sjálfur gefst hann aldrei upp og tekur öllu andstreymi með bros á vör. Enda alltaf jafn vongóður um að framtíðin beri eitthvað gott í skauti sér: „Ein jóna á dag kemur skapinu í lag.”
Myndin var tæp fjögur ár í vinnslu – en höfundur hennar fékk ávallt langt frí þegar söguhetjan þurfti að sitja af sér fyrir „eitthvað smotterí”.
Lalli Johns heillaði áhorfendur upp úr skónum þegar myndin var sýnd við rífandi aðsókn í Háskólabíói vorið 2001.
Lalli Johns hlaut Menningarverðlaun DV 2002 (besta íslenska mynd) og einnig tvenn Edduverðlaun (besta heimildarmynd, klipping og framleiðsla).
GRANDROKK (2004)
Grandrokk er einhver blautasta heimildamynd Íslandssögunnar. Hún gerist á árunum 1998-1999 þegar kráin Grandrokk við Klapparstíg flytur búferlum yfir á Smiðjustíg. En Grandrokk var – og er kannski enn – ein mesta menningarbúllan í miðbæ Reykjavíkur. Þangað eru allir velkomnir og knæpuna sækja menn úr öllum stigum samfélagsins.
Sumir segja að myndin fjalli töluvert um Hrafn Jökulsson og Skákfélag Grandrokks sem stofnað var í einhverju fyllerísrugli á barnum - og endaði sem margfaldur Íslandsmeistari. Hið rétta er að Hrafn leiðir söguna áfram, eftir bestu getu, ýmist allsgáður eða allur á ská og skjön – en aldrei leiðinlegur og alltaf með eitthvað á prjónunum.
Grandrokk er tour de force í gegnum tímabil í sögu kráarmenningar á Íslandi. Hún er hrá og skemmtileg – mynd sem hver og einn getur gert með lítilli myndavél og hljóðnema.
GRANDROKK UNITED - HETJUSAGA (2003)
Á hverju vori er haldinn kappleikur á milli Grandrokk United og stúlkna úr 2. flokki Stjörnunnar í Garðabæ. Strákarnir hafa ávallt þurft að lúta í gras – en núna er komið að því að gera eitthvað í málunum.
Grandrokk United er byggð á hugmynd Lísu Páls og er hún líka skráð sem leikstjóri. En aðalhöfundurinn var með tvær myndir í keppni um bestu Grandrokk myndina - sem var bannað samkvæmt leikreglum - og því fékk Lísa Páls ein heiðurinn.
Grandrokk – hetjusaga átti vissulega að hafna í fyrsta sæti í þessari sömu keppni (það sögðu allir Grandararnir) en femínistinn Elísabet Rónalds sat í dómnefnd og barðist hart gegn því. Myndin lenti því í öðru sæti.
DRAUMALANDIÐ (2009)
Draumalandið fjallar um þjóð sem er búin að koma upp öllum sínum innviðum og hefur öll tækifæri í hendi sér en ákveður að gera landið að einni stærstu málmbræðslu í heiminum. Til þess þarf að fórna einstæðri náttúru og þenja efnahagskerfið til hins ítrasta. Í aðdraganda hruns hins íslenska efnahagskerfis var farið út í stærstu framkvæmd Íslandssögunnar. Stærðarskalinn á þeim tíma var byltingarkenndur. Erlent vinnuafl var fengið til þess að byggja stærstu stíflu í Evrópu og orkuverðið var leyndarmál. Draumalandið lýsir saklausri þjóð sem dregur að sér öfl og fyrirtæki með vafasamt orðspor og hörmulega slóð eyðileggingar á bakinu. Draumalandið stefnir saman tilfinningum, vonum og væntingum, gömlu og nýju myndefni svo úr verður stór og epísk heimildarmynd sem nýtur sín hvergi betur en á hvíta tjaldinu.
